हेटौंडा \ मकवानपुर उद्योग वाणिज्य संघका अध्यक्ष कृष्ण कुमार गुप्ताको सभापतित्वमा जिल्ला प्रहरी कार्यालय मकवानपुरमा नव आगन्तुक प्रहरी प्रमुख, प्रहरी उपरीक्षक बामदेव गौतमको स्वागत तथा छलफल कार्यक्रमको आयोजना गरिएको छ ।
कार्यक्रममा मउवासंघका अध्यक्ष कृष्ण कुमार गुप्ताले स्वागत गर्दै जिल्लाको समस्या र सम्भावना बुझेको प्रहरी प्रमुख पाउनु अत्यन्त खुशीको विषय रहेको बताए । उद्योगी/व्यवसायीलाई सुरक्षित व्यवसाय संचालन गर्न सहयोग पुग्ने आशा व्यक्त गर्दै निजी क्षेत्रकोतर्फवाट पुर्ण सहयोग हुने वताए ।
कार्यक्रममा प्रहरी उपरीक्षक बामदेव गौतमले सवैको साथ, सहयोग, सुझावबाट अघि बढ्ने, सिसिटिभीको लागि हेटौडा उपमहानगरपालिकासँग समन्वय गरिने, ट्राफिक व्यवस्थापन, लागु औषध प्रयोगलाई निरुत्साहन, मोटरसाईकल चोरी नियन्त्रण, व्यवसायिक सुरक्षालगायतका विषयहरुमा कानूनी परिधिभित्र रहेर काम गर्ने बताए ।
आफु मकवानपुर जिल्लामा रहेर काम गरिसकेकाले सवैको साथ र सहयोग पाउने अपेक्षा राख्दै थप जिम्मेवार र योगदान गर्न आफु लागिपर्ने बताए ।
कार्यक्रममा संघका निवर्तमान अध्यक्ष कृष्ण कटुवाल, वरिष्ठ उपाध्यक्ष अनिल अग्रवाल, उपाध्यक्षद्वय उज्वल चौलागाई, राजु अधिकारी, महासचिव दीपक उप्रेती, कोषाध्यक्ष सन्तोष कुमार अर्याललगायतले आफ्ना भनाईहरु राखेका थिए । कार्यक्रममा सचिव राजाराम कार्की, सहकोषाध्यक्ष निलम पाण्डेलगायत कार्यसमितिका सदस्यहरुको उपस्थिति रहेको थियो ।
