७७ वर्षको उमेरमा पनि आरन पेशा सम्हाल्दै पदमलाल

समाचार

गृहपृष्ठ
समाचार

पुर्खौली पेशा ७७ वर्षको उमेरमा पनि आरन पेशा सम्हाल्दै पदमलाल सङ्कटमा आरन पेशा

मणिराज गौतम बिहीबार, भदौ ७, २०८०

हेटौडा \ खेतीपाती गर्नेको सङ्ख्या घट्दै गएपछि आरन पेशा सङ्कटमा पर्न थालेको छ । पछिल्लो समय प्रविधिको विकाशले फडको मारेपछि आरन पेशामा लाग्नेहरुको दैनिकी समेत चल्न गाह्रो पर्न थालेको छ । पुर्खौली पेशा बाहेक अन्य काम नजानेका यस्ता पेशाका मानिसहरु अहिले परम्परागत काम छाडेर अन्य पेशामा लाग्न थालेका छन । यस्तो अवस्थामा पनि मकवानपुरको बकैयाँ गाँउपालिका वडा नम्बर ५ निवासी पदमलाल विश्वकर्मा भने ७७ वर्षको उमेरमा पनि आरन पेशा चलाई रहनु भएको छ ।

उहाँले १३ वर्षको उमेर देखी आफनो पुर्खौली पेशालाई अंगाल्दै आउनु भएको बताउनुहुन्छ । यही पेशाबाट आफनो ४ जनाको परिवार पाल्दै आउनु भएको उहाँले पुर्खौली पेशा छाड्न नसकेको बताउनु भयो । आफुले अन्य कुनै काम नजानेको र बाबुबाजेले गर्दै आएको यही पेशालाईनै निरन्तरता दिएको बताउनु भयो । विश्वकर्माले परम्परागत रुपमा फलाम ल्याएर हँसिया, कुटो, कोदालो, खुकुरी र दाउ बनाउने गर्नुहुन्छ । पछिल्लो समय कोइला समेत नपाउँदा काममा अप्ठ्यारो भएको उहाँले बताउनु भयो ।

पहिला पहिला त राम्रै थियो अहिले त उति सारो कमाई छैन उहाँले बताउनु भयो । यो पेशाबाट परिवार पाल्न पुगेको उहाँले बताउनु भयो । पछिल्लो समय कुटो कोदालोको प्रयोग पनि घट्दै गएको छ यसले पुर्खौली पेशा सङ्कटमा पारेको उहाँको भनाई छ । बजारमा छ्यासछ्यास्ती खुलेका ग्रील उद्योगका कारण पनि आरन पेशामा न्यून मात्रामा काम आउने गरेपछि विश्वकर्माले पुर्खौली पेशा सङ्कटमा पारेको बताउनु भयो । प्रविधिको विकाससँगै पेशालाई बदल्न नसक्दा गाउँका कतिपय आरन पेशा गर्नेहरुले छाडिसकेको उहाँले बताउनु भयो ।

प्रकाशित मिति: बिहीबार, भदौ ७, २०८० १५:४८

प्रतिक्रिया दिनुहोस्