गुणस्तरिय सेवा प्रवाह गर्न मन्त्री जोशीको निर्देशन

समाचार

गृहपृष्ठ
समाचार

स्वास्थ्य गुणस्तरिय सेवा प्रवाह गर्न मन्त्री जोशीको निर्देशन

सिधाखबर मंगलबार, फागुन १, २०८०

हेटौंडा \ बागमती प्रदेशका स्वास्थ्य मन्त्री उत्तम जोशीले नागरिकहरुको असन्तुष्टि र गुनासोहरुलाई सम्बोधन गर्ने गरी काम गर्न कर्मचारीहरुलाई निर्देशन दिएका छन् । उनले सेवा प्रवाहको गुणस्तर कायम गरी व्यवस्थित रुपमा काम गर्न कर्मचारीहरुलाई आग्रह गरेका हुन् ।

मंगलबार जिल्ला स्वास्थ्य कार्यालय मकवानपुर र जिल्ला आयुर्वेदे स्वास्थ्य केन्द्रको स्थलगत अनुगमन गर्दै मन्त्री जोशीले पछिल्लो समय स्वास्थय सेवा प्रति नागरिकहरुको गुनासो क्रमशः बढ्दै गएकाले त्यसको सही रुपमा समाधानमा जुट्न जरुरी रहेको बताए । प्रदेश सरकारले स्वास्थ्य क्षेत्रमा रहेका समस्याहरु हल गर्नेगरी नीतिगत सुधारको काम गर्ने प्रयत्न गरेकाले मतहतका निकायहरुमा कार्यरत कर्मचारी जिम्मेवार बन्नुपर्ने उनको भनाई छ ।

उनले जिम्मेवार र जवाफदेही बनेर सेवा प्रवाहमा सरकारी संयन्त्रको मुख्य पिल्लरका रुपमा रहेको कर्मचारीहरुले भुमिका खेल्नुपर्ने बताए । स्थायी सरकारको रुपमा रहेको कर्मचारी संयन्त्रले नागरिकहरुसंगको सम्बन्ध बलियो बनाउन भुमिका खेल्नु पर्ने उनको भनाई छ । मन्त्रालयले लिएका योजनाहरु र मार्ग निर्देशनलाई आत्मसाथ गरेर अघि बढ्न उनले कर्मचारीहरुलाई आग्रह गरे । मन्त्रालय नागरिकको स्वास्थ्य उपचारको विषयमा गम्भिर भएर सेवा प्रवाहलाई छिटो छरितो र सर्वसुलभ बनाउने तर्फ अग्रसर भएको मन्त्री जोशीले बताए । मन्त्री जोशीले स्वास्थ्य कार्यालय मार्फत स्थानीय तहसंगको समन्वय र मन्त्रालयको योजना तथा कार्यक्रम कार्यान्वयनमा भुमिका खेल्न निर्देशन गरेका थिए ।

उनका अनुसार मन्त्रालयबाट नागरिकको स्वास्थ्य उपचार सम्बन्धी संवैधानीक अधिकार सुनिश्चितता गर्न अस्पतालका शैया निःशुल्क गर्ने, विभिन्न जाँच तथा सेवामा छुट तथा असाहाय विरामीका लागि निःशल्क उपचारको व्यवस्था मिलाइएको छ । पछिल्लो समय नागरिकहरुको रुचि आयुर्वेदीक उपचार तर्फ बढ्दो क्रममा रहेकाले सोको व्यवस्थापनमा सरकारले थप योजनाहरु निर्माण गर्ने मन्त्री जोशीले बताए । उनले नागरिकहरुको सहजताका लागि मन्त्रालय मातहतका निकायमा आवश्यक दरवन्दी स्वीकृत गरी प्रदेश लोकसेवा आयोगबाट पदपूर्तिको चरणमा रहेको बताए ।

अनुगमनका क्रममा आयुर्वेदीक स्वास्थ्य केन्द्रमा भेटिएका सेवाग्राहीसंग समेत मन्त्री जोशीले अन्तरक्रिया गरेका थिए । सेवाग्राहीहरुले आयुर्वेदीक सेवा केन्द्रको उपचार पद्धति राम्रो रहेको बताएका थिए । केन्द्रको भौतिक संरचना साँघुरो र अव्यवस्थित रहेकाले उचित व्यवस्थापन मिलाउन सेवाग्राहीहरुले माग गरेका थिए । सेवाग्राहीसंगको अन्तरक्रियामा मन्त्री जोशीले केन्द्रको समस्या समाधानका लागि सरकारले प्रयत्न गरीररहेको र केन्द्रको नयाँ भवन निर्माणको काम भइरहेकाले व्यवस्थापनमा समस्या भएको बताएका थिए ।

प्रकाशित मिति: मंगलबार, फागुन १, २०८० १७:१६

प्रतिक्रिया दिनुहोस्