हेटौडा / हेटौँडा १७ निवासी उत्तम श्रेष्ठले खुवा व्यवसायबाट मासिक एक लाख रुपैयाँ कमाउँदै आउनु भएको छ । उहाँ यसै पेसाबाट आत्मनिर्भर बन्दै आउनुभएको हो । श्रेष्ठको दैनिकी बिहान उठे देखी राती अबेर सम्म खुवा घोटेर बित्ने गर्दछ । दुई वर्ष देखी खुवा व्यवसायमा लागेका श्रेष्ठको चुच्चे खोलामा उत्तम खुवा घर सञ्चालनमा छ । खुवा व्यवसायमा लाग्नु अघि श्रेष्ठले लामो समय देखी किराना पसल र तोरी मेल सञ्चालन गर्दथे । गाउँघरमा उधारो धेरै हुने गरेकाले किराना पसलबाट खासै उपलब्धि हुन नसकेपछि श्रेष्ठ खुवा व्यवसायतर्फ लाग्नु भएको उहाँ बताउनुहुन्छ । खुवाको हब बन्दै गएको सोही स्थानमा खुवा व्यवसायलाई सम्हाल्न पुगेका उहाँले आजभोलि दैनिक तीस किलो खुवा बिक्री गर्दै आउनु भएको छ ।
उहाँको पसलमा खुवासँगै खुवाका विभिन्न मिठाईका परिकार, केराको मम, छोइला, पनि र, पुष्टकारीहरू उत्पादनसँगै बिक्री समेत हुने गर्दछ । खुवा व्यवसायमा मनग्य आम्दानी देखेका उहाँले दूधको आपूर्तिका लागि किसानलाई भैँसी किन्न लगानी समेत गर्नुभएको छ । आफूलाई खुवाको लागि भैँसीको दूध आवश्यक पर्छ सोही अनुरूप लगानी गरेर भैँसी किन्न लगाउँछु, उहाँले बताउनुभयो । आफूले भैँसी खरिदका लागि किसानलाई दश लाख रुपैयाँ लगानी गरिसकेको श्रेष्ठले बताउनुभयो । परम्परा भन्दा आधुनिकता तर्फ लम्कँदै व्यवसाय गर्नका लागि उहाँले सफा, सुग्घर र आकर्षित सजावट गर्दै व्यवसायलाई अगाडी बढाइरहनु भएको छ । खुवाको हब बन्दै गएको चुच्चे खोलामा हेर्दा पनि आकर्षण तरिकाको पसल उहाँको छ । पर्यटकलाई सफा र आकर्षण देखिनुपर्छ सोही अनुरूप परिकारहरूमा पनि सफा र स्वादिष्ठ उत्पादन गर्ने गरेको उहाँको भनाई छ ।
खुवा पेसा सममाले देखी उहाँले आफ्नो व्यवसायबाट ६ जना कर्मचारीलाई रोजगारी दिएको समेत उहाँले बताउनभयो । खुवासँगै खाजा नास्ता लगायतबाट मासिक दश लाख रुपैयाँको कारोबार हुने गरेको श्रेष्ठले बताउनुभयो । मासिक दूध खरिद्,खुवा पकाउने दाउरा खरिद्,कर्मचारी लगायतमा मासिक साढे आठ लाख खर्च हुने गरेको उहाँले बताउनु भयो । अरू पेसामा भन्दा खुवा पेसामा काम गर्दा सन्तुष्ट मिलेको उहाँको भनाई छ । आफूसँगै परिवारलाई पनि सपोर्ट लिएर उहाँले खुवा व्यवसायलाई अझै बढाउने सोचमा रहेको बताउनु भयो ।
खुवा बेचेरै मासिक एक लाख रुपैयाँ कमाउन सकिने भएपछि उहाँले पैसा कमाउन बिदेसिने युवापुस्तालाई देशमै कमाउन सकिने उदाहरण प्रस्तुत गर्न भएको छ । उहाँको पसलबाट उत्पादित खुवा काठमाडौँ, ललितपुर, भक्तपुर, काभ्रे, चितवन लगायतका जिल्लाहरूमा निर्यात हुने उहाँले बताउनु भयो । कान्तिलोक पथ भएर हिडने यात्रीहरू र खुवाको पारखीहरूलाई आजभोलि उत्तमको खुवा पसलले आर्कष्ण गर्ने गरेको छ । खुवा व्यवसायबाट पनि आत्मनिर्भर बन्न सकिने राम्रो उदाहरण उहाँले प्रस्तुत गर्नुभएको छ ।
