हेटौँडा \ हेटौँडा उपमहानगरपालिका निकृष्ट बालश्रम मुक्त, बाल विवाहमुक्त तथा बालमैत्री स्थानीय शासनयुक्त पालिका घोषणा गर्ने भएको छ । यसअघि ५१ सूचक पूरा गर्दै उपमहानगरपालिकाका १९ वटै वडाले बालमैत्री वडा घोषणा भइसकेका छन् । नगरले भने फागुन १ गते घोषणाको तयारी रहेको जनाइएको छ । मंगलबार पत्रकार सम्मेलन गर्दै १ गतेलाई घोषणा गर्ने गरि आवश्यक तयारी पुरा गरिएको नगर प्रमुख मीनाकुमारी लामाले बताईन् ।
कार्यान्वयन निर्देशिकामा उल्लेख ५ वटा कार्यान्वयनका चरणहरु, २८ वटा तहगत खुड्किलाहरु पार गर्दै ५१ वटा सूचक पुरा गरी निकृष्ट बालश्रम मुक्त, बाल विवाहमुक्त तथा बालमैत्री स्थानीय शासनयुक्त पालिका घोषणा समारोहको चरणमा पुगेको उनले बताईन् ।
नगरपालिकाले साढे दुई वर्षदेखि १९ वडामै सहजकर्ताहरु खटाएर सुचक पुरा गर्ने अभियानमा लागेको बताउँदै उपमहानगरपालिकामा घरधुरी तथ्यांक सर्वेक्षण २०७९ अनुसार १८ वर्ष मुनिका बालबालिकाको जनसंख्या ५० हजार १ सय ९५ रहेको छ । जसमा २६ हजार १ सय ४५ बालक र २४ हजार ५० बालिका रहेको प्रमुख लामाले बताइन् । नगरका कुल बालबालिकाको संख्यालाई आधार मान्दा ५२।०८ प्रतिशत बालक र ४७।९१ प्रतिशत बालिका रहेको तथ्याङ्कले देखाउँछ ।
उपमहानगरपालिकामा टोल स्तरीय २ सय ६५ र विद्यालय स्तरीय १ सय ६ वटा बालसमुह गरि ३ सय ७१ वटा बालसमुह छन् भने १९ वडा स्तरीय र १ नगर स्तरीय गरि २० वटा बाल संजाल गरि ३ सय ७१ वटा बालबालिका संरचना क्रियाशील रहेका छन् ।
बालमैत्री घोषणाका लागि आवश्यक ५१ सुचकहरुमध्ये ४३ वटा सुचकमा १०० प्रतिशत, १ वटा सुचकमा ९९।९४ प्रतिशत १ वटा सुचकमा ९९।८९ प्रतिशत, १ वटा सुचकमा ९९।८७ प्रतिशत, १ वटा सुचकमा ९९।१ प्रतिशत, १ वटा सुचकमा ९८।६३ प्रतिशत, १ वटा सुचकमा ९६।८४ प्रतिशत, १ वटा सुचकमा ९१ प्रतिशत र बाँकि १ वटा सूचकमा ८८।०६ प्रतिशत नतिजा हाँसिल भएको नगरप्रमुख लामाले बताईन् ।
प्रभातफेरी गर्दै बजारक्षेत्र परिक्रममा गरेर हेटौँडा ५ क्याम्पा रंगशालामा सभामा परिणत गरी घोषणा समारोह सञ्चालन हुने उनले बताएकी छिन् । घोषणासँगै आगामी दिनमा निरन्तरताको चुनौति रहेको बताउँदै आगामी वर्षमा समेत योजना, कार्यक्रम र बजेटका साथ अघि बढ्ने प्रतिवद्धता व्यक्त गरिन् । राजधानी समेत रहेकाले सबै फाँटका कर्मचारीलाई जिम्मेवारी बनाउँदै बाल सहजकर्ता राखेर व्यथितिको अन्त्य गर्न कुनै पनि कसुर नराख्ने गरि काम गर्नेछौं, प्रमुख लामाले भनिन् ।
नगरलाई बालमैत्री स्थानीय शासनयुक्त घोषणा उपप्रधान एवम् शहरी विकासमन्त्री प्रकाशमान सिंहले गर्ने कार्यतालिका रहेको उपमहानगरले जनाएको छ । यसअघि मकवानपुरगढी गाउँपालिका, मनहरी गाउँपालिका र बकैंया गाउँपालिका बालमैत्री पालिका घोषणा भइसकेका छन् ।
