हेटौंडा \ उपप्रधान तथा शहरी विकास मन्त्री प्रकाशमान सिंहले नागरिकको आवश्यकता अनुसारको विकासमा जोड्दिनु जरुरी रहेको बताउनु भएको छ । बिहीबार हेटौँडा–५ स्थित पिप्ले क्याम्पा रङ्गशालामा हेटौंडा उपमहानगरपालिकालाई बालमैत्री स्थानीय शासनयुक्त नगर घोषणा सभालाई सम्बोधन गर्नुहुँदै मन्त्री सिंहले स्थानीय तहमा भौगोलिक विषमताका बीच थुप्रै अवसरहरू रहेको बताउनुभयो ।
स्थानीय तहका सम्भावनाहरूको पहिचान सहित विकास आयोजनाहरू व्यवस्थित ढङ्गबाट परिचालन गर्नुपर्नेमा जोड दिनुहुँदै मन्त्री सिंहले स्थानीय तहले समस्या र चुनौतिलाई व्यवहारिक तथा प्रक्रियागत रूपमा व्यवस्थापन गर्नुपर्ने बताउनुभयो । हेटौँडा उपमहानगरपालिकामा रहेका समस्याहरूलाई सही ढङ्गबाट व्यवस्थापन गर्ने र नागरिकको आवश्यकता अनुसारको विकासका काममा अग्रसर हुन उपमहानगरलाई आग्रह गर्दै उहाँले स्थानीय तहहरुले नागरिकको माग अनुसार विकासका आयोजनाहरू परिचालन हुनुपर्नेमा जोड दिनुभयो ।
हेटौँडाले व्याप्त कुरीति हटाउन एक्सनमा उत्रिएर वैज्ञानिक सूचक पार गरेर बालमैत्री घोषणा अभियानलाई सार्थकता दिन सफल भएकोमा बधाई दिनुहुँदै उहाँले भन्नुभयो, ‘हेटौँडा अहिले व्यवस्थित सहरको रूपमा विकास भइरहेको छ । नगरपालिकाबाट विस्तार हुँदै उपमहानगरपालिका र अब महानगरपालिकामा परिणत हुने चरणमा हेटौँडा पुगेको छ । उपमहानगरपालिका क्रमशः समस्या र चुनौतिहरूको व्यवस्थापन सहित त्यसतर्फ अग्रसर भइरहेको छ ।’
मन्त्री सिंहका अनुसार बालबालिकाको सर्वगिंण विकासका लागि राज्यसँगै परिवारको भूमिका अपरिहार्य रहेको बताउनुभयो । परिवारबाट पनि बालबालिकामा आफ्नो भूमिका निर्वाह गरी बालमैत्री स्थानीय तह निर्माणको अभियानमा अपनत्व ग्रहण गरेर अघि बढ्नु पर्नेमा उहाँले जोड दिनुभयो । बालबालिकाको अधिकार तथा नागरिकको मौलिक हक प्रत्याभूत गर्ने सवालमा स्थानीय तह देखि प्रदेश र सङ्घ सरकारले काम गर्नुपर्ने उहाँको भनाई छ । उपयुक्त योजना र रणनीति सहित बालबालिकाको क्षेत्रमा लगानी बढाउनु पर्नेमा उहाँले जोड दिनुभयो । घोषणा भन्दा पनि दीगोपनमा गम्भीर बन्नु पर्ने उहाँको भनाई छ ।
बालमैत्री स्थानीय शासनयुक्त नगर घोषणा सभामा बागमती प्रदेशका कार्यबहाक मुख्यमन्त्री प्रकाश श्रेष्ठ, प्रतिनिधि सभा सदस्य दीपक बहादुर सिंह, बागमती प्रदेश सदस्य इन्द्रबहादुर बानियाँ, प्रेमबहादुर पुलामी लगायतले बालमैत्री दीगो बनाउन आ–आफ्नो ठाउँबाट काम गर्ने सामूहिक प्रतिवद्धता व्यक्त गर्नुभयो । उहाँहरूले बालमैत्री घोषणा गरेर आफ्नो हैषियत उन्नत बनाएकोमा हेटौडा उपमहानगरपालिकालाई अब भौतिक विकाससँगै सामाजिक विकासलाई पनि उत्तिकै महत्व दिनुपर्नेमा जोड दिनुभएको थियो । समारोहमा नगरप्रमुख मीनाकुमारी लामाले उपमहानगरपालिकाको ५६ औँ स्थापना दिवस पारेर बालमैत्री नगर घोषणा गर्न पाउँदा भाग्यमानी भएको बताउनु भयो ।
यो हामी सबैको प्रयास हो आज देखी हेटौँडालाई बालमैत्री नगर घोषणा गर्न सफल भएका छौ उहाँले भन्नुभयो । बालमैत्री स्थानीय शासन कार्यान्वयन निर्देशिका, २०७८ र घोषणा कार्यविधि, २०७९ मा आधारित भई आवश्यक सबै सूचक पूरा गरेर घोषणा गरेको नगरप्रमुख लामाले बताउनुभयो । उहाँले बालमैत्री घोषणा कार्यान्वयन भने चुनौतिपूर्ण रहेको उल्लेख गर्नुहुँदै सबैको सहयोग र सहकार्य आवश्यक रहेकोमा जोड दिनुभयो ।
मकवानपुरका १० पालिकामध्ये मकवानपुरगढी गाउँपालिका, मनहरी गाउँपालिका र बकैया गाउँपालिका यसअघि नै बालमैत्री पालिका घोषणा भइसकेका छन् । हेटौँडा जिल्लाको चौथो पालिकाको रूपमा बालमैत्री घोषणा भएको हो । नगरका उपमेयर राजेश बानियाँले हेटौँडा उपमहानगरपालिकाले घोषणाका लागि आवश्यक ५१ सूचकमध्ये ४३ सूचकमा सतप्रतिशत नतिजा प्राप्त गरेसँगैै बिहीबार देखी हेटौंडालाई बालमैत्री घोषणा गर्न सफल भएकोमा सबैमा बधाई व्यक्त गर्नुभयो । १९ वटा वडा रहेको हेटौँडा उपमहानगरपालिकामा १८ वर्षमुनिका ५० हजार एक सय ९५ बालबालिका रहेका छन ।
