हेटौंडा \ आन्तरिक राजस्व कार्यालय हेटौंडा मकवानपुरले चालु आव २०८१/८२ को ७ महिनाको अवधिमा ३ अर्ब ७० करोड ९१ लाख राजस्व संकलन गरेको छ । यो लक्ष्यको ८१ दशमलव ४४ प्रतिशत सङ्कलन भएको हो । कार्यालय प्रमुख प्रमुख कर अधिकृत युक्तप्रसाद सुवेदीका अनुसार चालु आव २०८१/८२ को सात महिनाको अवधिमा चार अर्ब ५५ करोड ४२ लाख नौ हजार रुपैयाँ राजस्व सङ्कलन गर्ने लक्ष्य रहेकोमा तीन अर्ब ७० करोड ९१ लाख ४२ हजार रुपैयाँ राजस्व सङ्कलन गर्न सफल भएको छ ।
यही साउनदेखि माघ महिनासम्मको अवधिमा अन्तशुल्कतर्फ रू दुई अर्ब १२ कारेड १६ लाख २९ हजार, आयकरतर्फ ६५ करोड ५८ लाख ८१ हजार रुपैयाँ, मूल्यअभिवृद्धि करतर्फ ५० करोड ४७ लाख ९३ हजार रुपैयाँ, स्वास्थ्य जोखिम करतर्फ ३५ करोड ६७ लाख ३१ हजार रुपैयाँ, ब्याजकरतर्फ पाँच करोड ९१ लाख तीन हजार रुपैयाँ र बहालकरतर्फ एक करोड १० लाख छ हजार रुपैयाँ राजस्व सङ्कलन भएको प्रमुख सुवेदीले बताउनुभयो ।
प्रमुख सुवेदीका अनुसार चालु आव २०८१/८२ मा रू आठ अर्ब ४४ करोड राजस्व सङ्कलन गर्ने वार्षिक लक्ष्य छ । सो कार्यालयमा आयकरतर्फ ३३ हजार पाँच सय ९६, मूल्य अभिवृद्धितर्फ पाँच हजार आठ सय ४९, अन्तशुल्कतर्फ एक हजार पाँच सय ९८, ‘विथहोल्ड’तर्फ सात सय ११ र व्यक्तिगततर्फका ८१ हजार आठ सय १२ करदाता रहेका छन् ।
पछिल्लो समय मुलुकमा आर्थिक कारोबार बढ्नु, बैंक तथा वित्तीय संस्थाबाट ऋण प्रवाहमा सहजता हुनु, कर नीतिमा सुधार हुनु, नियमित बजार अनुगमन, करदाता शिक्षा सञ्चालन तथा बाँकी बक्यौता असुलीमा गरिएको कडाइजस्ता कारणले राजस्व सङ्कलनमा वृद्धि भएको प्रमुख सुवेदीको भनाइ छ ।
