हेटौंडा \ निर्माण व्यवसायी संघ मकवानपुरको आयोजनामा हेटौंडामा ‘दोस्रो राष्ट्रिय निर्माण तथा व्यापार महोत्सव २०८१’ सुरु भएको छ । नेपाल सरकारका गृहमन्त्री रमेश लेखकले मुलुकमा दिगो शान्ति, सुशासन, विकास र समृद्धिका लागि दुई ठुला दल कांग्रेस र एमालेको सरकार बनेको दाबी गरेका छन्। दिगो शान्ति र सुशासनको यात्रालाई अगाडि बढाउन अहिलेको समीकरण निर्माण भएको उनको भनाइ छ।
निर्माण व्यवसायी संघ मकवानपुरको आयोजनामा मंगलबारबाट सुरु भएको राष्ट्रिय निर्माण तथा व्यापार महोत्सव २०८१ लाई सम्बोधन गर्दै लेखकले प्राप्त उपलब्धिलाई संस्थागत गर्दै मुलुकमा सुशासन, विकास र समृद्धि कायम गर्नु अहिलेको सरकारको मुख्य कार्यभार भएको स्पष्ट पारे।
१८ फागुनसम्म चल्ने महोत्सव निर्माणको क्षेत्रमा प्रयोगमा आएका अत्याधुनिक उपकरण र निर्माण सामग्रीहरूको प्रदर्शनी तथा बिक्री गरिने मुख्य उद्देश्य रहेको निर्माण व्यवसायी संघ मकवानपुरका अध्यक्ष बालगोपाल कँडेलले जानकारी दिए । महोत्सव अवधिभर निर्माण उद्योग क्षेत्रमा रहको समस्या, चुनौती, अवसरका बारेमा छलफल, गोष्ठी लगायतका अन्तरक्रियात्मक कार्यक्रमहरु समेत हुने उनको भनाई छ ।
यस्तै महोत्सव अवधिमा निर्माण व्यवसायी, दर्शक, उपभोक्ताहरूका राय, सल्लाह, सुझाव समेत संकलन गरिने अध्यक्ष कँडेलले जानकारी दिए । उनका अनुसार महोत्सवमा निर्माण उपकरण, निर्माण सामग्री, औद्योगिक उत्पादन, स्थानीय उत्पादन, हस्तकला सामग्री लगायतका ३०० बढी स्टल रहेका छन् ।
महोत्सवमा हेटौंडा आइडल प्रतियोगिताका साथै प्रत्येक दिन राष्ट्रिय एवं स्थानीय कलाकारहरूको सांगितीक तथा सांस्कृतिक प्रस्तुति समेत रहने आयोजकले जनाएको छ । हेटौँडा आइडलमा प्रारम्भिक छनौटबाट १६ जना प्रतिस्पर्धी छानिसकिएको महोत्सव प्रचार प्रसार संयोजक सुरज बर्तौलाले जानकारी दिए ।
२०७१ सालमा पहिलो पटक महोत्सव गरेको संघले १० वर्षपछि महोत्सव गर्न लागेको हो । निर्माण व्यवसायी संघको नयाँ भवन निर्माण गर्ने उद्देश्यसहित महोत्सवको आयोजना गरिएको संघका महासचिव राजेन्द्र चौलागाईंले जानकारी दिए । संघको अहिले रहेको भवन जीर्ण भएपछि नयाँ भवन बनाउने उद्देश्य लिएर संघले महोत्सवको आयोजना गरेको उनको भनाई छ ।
