कैलाश \ मकवानपुरको कैलाश गाउँपालिकामा बुधबारबाट पालिका स्तरीय राष्ट्रपति रनिङ्ग शिल्ड प्रतियोगिता सुरु भएको छ । कैलाश गाउँपालिकाको आयोजना तथा खेलकुद विकास समितिको व्यवस्थापनमा प्रतियोगिता सुरु भएको हो । भवानी माध्यमिक विद्यालयको खेल मैदानमा दुई दिन सञ्चालन हुने प्रतियोगितामा ६ वटा माध्यामिक विद्यालयले सहभागिता जनाएका छन् ।
समितिका संयोजक मोहन वाईवाको सभाध्यक्षता तथा पालिका अध्यक्ष लोकबहादुर मोक्तानको प्रमुख आतिथ्यतामा प्रतियोगिता उद्घाटन गरिएको थियो । कार्यक्रम उद्घाटन पश्चात बोल्दै अध्यक्ष मोक्तानले स्वास्थ्यको लागि खेलकुद राष्ट्रको लागि खेलकुद भन्ने नाराका साथ पहिलो पटक खेलकुद विकास समिति मार्फत प्रतियोगिता गरिएको बताए ।
विगतमा विद्यालयको व्यवस्थापनमा भइरहेको प्रतियोगिता ऐनमा उल्लेख भए बमोजिम यसवर्ष देखी भने समिति मार्फत प्रतियोगिता गरिएको अध्यक्ष मोक्तानले बताए । गत वर्ष कैलाशले जिल्ला स्तरीय प्रतियोगितामा स्वर्ण एक, रजत तीन र कास्य दुई वटा पदक जित्न सफल भएका छौं, सोही अनुरुप अहिले विजयी भएर जिल्लामा गई छात्रछात्राले विभिन्न पदक जित्न सफल हुनेछन् भन्ने विश्वास लिएको उनले बताए ।
उनले खेललाई मर्यादित र अनुशासित भएर खेल्न आग्रह गर्दै भौगोलिक विकटता रहेको कैलाशलाई शिक्षा र खेलकुद क्षेत्रको विकासमा वृद्धि गर्दै लगिरहेको बताए । उनले यसैवर्षदेखी पहिलो पटक कैलाशको कालिका माविलाई एसईइ परीक्षाको केन्द्र तोकेको बताए । यहाँका विद्यार्थीले हेटौंडा, थाहा,मनहरीमा परीक्षा सेन्टर तोकेर जानुपर्ने बाध्यता हटेको बताउँदै अब कालिका माविमा विद्यार्थीले सहज वातावरणमा परीक्षा दिन सकिने बताए ।
कार्यक्रममा पालिका उपाध्यक्ष बालकुमार मल्लले विद्यालयबाटै खेलकुलको विकास गर्न सके राष्ट्रिय खेलाडी तयार हुन सहजता हुने बताए । उनले अनुशासित भएर खेलाडीलाई आग्रह गर्दै जिल्ला, प्रदेश र केन्द्र सम्म पुगी पदक जित्न खेलाडीलाई शुभकामना व्यक्त गरेका थिए ।
कार्यक्रममा वडा नम्बर ३ का वडाध्यक्ष देवलाल बल, पालिका निमित्त प्रमुख प्रशासकीय अधिकृत समीर जोशी, भवानी माविका प्रअ बालचन्द्र मल्ललगायतले आफ्नो भनाइ राखेका थिए ।
कार्यक्रममा भवानी माविका अध्यक्ष नमराज ओझा, प्रहरी चौकी भार्ताका प्रमुख धर्मदेव प्रसाद साह, प्रतियोगिताका रेफ्रि रमणकुमार झा र नन्नदलाल लामा, विभिन्न विद्यालयका प्रअ तथा विद्यालय अध्यक्षहरुको आतिथ्यता रहेको थियो ।
प्रतियोगितामा तीन विधाका खेल खेलाईने जनाइएको छ । भलिबल, मार्सल आर्ट र एथ्लेटिक्स खेलबीच प्रतिस्पर्धा रहने छ । एथ्लेटिक्समा एक सय, दुई सय, चार सय र आठ सय मिटरको दौड, हाइजम्प, लमजम्प, सर्टफुट लगायत अन्य खेल रहेका छन् भने छात्रतर्फ भलिबल र कालिका मावि र रत्नज्योति माविका विद्यार्थीबीच मार्सल आर्ट रहने समितिका सदस्य सचिव समेत रहनुभएका शिक्षा अधिकृत समीर जोशीले बताए ।
छनोट भएका विद्यार्थीलाई जिल्ला खेल्न पठाइनुका साथै पदकको आधारमा विद्यालयलाई राष्ट्रपति रनिङ्ग शिल्ड प्रदान गरिने जोशीले बताए । प्रतियोगितामा कमलादेवी मावि कैलाश-२, भवानी मावि कैलाश-३, व्यास मावि कैलाश-६, धुवाङ्ग मावि कैलाश-८, कालिका मावि कैलाश-९ र रत्नज्योति मावि कैलाश-१० का विद्यालयका विद्यार्थीहरुले सहभागिता जनाएको जोशीले बताए । विजेताहरुलाई विहीबार एक कार्यक्रमका बीच पुरस्कार प्रदान गरिनेछ ।
