कैलाश \ मकवानपुरको कैलाश गाउँपालिका वडा नम्बर २ कैलाशमा जीपलाईन सञ्चालन हुने भएको छ । निर्माण कार्य पुरा भएको जीपलाईनमा डमी परीक्षण पश्चात सञ्चालन सुरु गरिने गाउँपालिकाका अध्यक्ष लोकबहादुर मोक्तानले बताउनुभयो । एक साताभित्र परीक्षण गर्ने तयारी हाम्रो छ, सोही अनुसार काम अगाडी बढि रहेको उहाँले बताउनुभयो । धार्मिक तथा पर्यटकीय प्रवद्र्धनका लागि बुहवर्षिय योजना बनाई ठेक्का प्रणालीमा कार्य गरिएको अध्यक्ष मोक्तानले बताउनुभयो । कैलाश र बैकुण्ठका दुई धार्मिक तथा पर्यटकीय स्थलका पहाडलाई जोड्ने गरी जीपलाईन निर्माण गरिएको उहाँको भनाई रहेको छ ।
हामीले १२ सय मिटर लामो जीपलाईन निर्माण गरेका छौँ,जीपलाईन बाहेकका अन्य संरचना निर्माण गर्न समेत बाकीँ रहेको उहाँले बताउनुभयो । आव २०८०/०८१ म फोरजी कम्पनीले सम्भाव्यता अध्ययन पश्चात हामीले निर्माणको कार्य अघि सारेका थियौँ, अब परीक्षण पश्चात सञ्चालन गर्छौ, अध्यक्ष मोक्तानले भन्नुभयो ।
शनिबार कास्की साराङकोटमा सञ्चालित जीपलाईनको अध्यक्ष मोक्तान सहित पालिका उपाध्यक्ष बालकुमार मल्ल ठकुरी, प्रमुख प्रशासकीय अधिकृत अमुल श्रेष्ठ, लेखा प्रमुख नवीन धिताल, योजना शाखा प्रमुख नरेन्द्र दत्त भट्ट र पालिकाका प्राविधिकहरुको टोलीले आवश्यक अध्ययन अवलोकन गर्नुभएको थियो । जीपलाईनको अप्रेसन तथा ब्रेकिङ्ग सिस्टम बारेमा अध्ययन गरिएको योजना शाखा प्रमुख नरेन्द्रदत्त भट्टले बताउनुभयो । गिनिज बुक वल्र्ड रेकर्ड राख्न सफल भएको १८ सय मिटर लामो जीपलाईनको प्राविधिक पक्षको अध्ययन गरेका हौँ, अब हामी पनि छिट्टै परीक्षण गरि जीपलाईन सञ्चालनमा ल्याउने छौं, भट्टले बताउनुभयो ।
उहाँले सम्भाव्यता अध्ययन फोरजी कम्पनीले गरी गाउँपालिकालाई प्रतिवेदन समेत बुझाएको थियो, सोही अनुरुप बजेट निकासा गर्दै कामलाई निरन्तरता दिइएको उहाँको भनाइ रहेको छ । प्राविधिक टोलीहरु यही सातामा कैलाश आउने र प्रारम्भिक परीक्षण गरिने योजना प्रमुख भट्टले बताउनुभयो । जीपलाईन सञ्चालनका लागि आवश्यक कर्मचारीलाई सीप तालिम सहित आवश्यक तयारी गाउँपालिकाले अझै गर्न बाकीँ रहेको समेत उहाँले बताउनुभयो ।
