कैलाश \ मकवानपुरको कैलाश गाउँपालिकाका प्रारम्भिक बाल विकास शिक्षकहरुका लागि चार दिने मन्टेश्वरी तालिम मंगलबारबाट सुरु भएको छ । गाउँपालिकाको शिक्षा, युवा तथा खेलकुद शाखाको आयोजनामा भएको तालिम कैलाश वडा नम्बर ९ मा अवस्थित कालिका माध्यामिक विद्यालयमा तालिम सञ्चालन भएको हो ।
कालिका माध्यामिक विद्यालयका प्रधानाध्यापक रामप्रसाद कालाखेतीको अध्यक्षता तथा गाउँपालिका उपाध्यक्ष बालकुमार मल्ल ठकुरीको प्रमुख आतिथ्यतामा तालिमको उद्घाटन गरिएको हो । कार्यक्रममा बोल्दै उपाध्यक्ष ठकुरीले बालविकासका शिक्षकको कार्यक्षमतामा वृद्धि हुने ध्येयका साथ तालिम सञ्चालन गरिएको बताए । यो दोस्रो पटकको तालिम हो सिकेको सीपलाई कार्यान्वयन गर्न आग्रह गर्दै उनले सुरुवातको सिकाइ नै गाह्रो सिकाई हो, त्यसलाई आत्मसाथ गर्दै आइरहनु भएको अवस्थामा यहाँहरुको भूमिका महत्वपूर्ण रहेको बताए ।
शिक्षा क्षेत्रमा हामी अलि पछाडि परेको अवस्थामा सिकाई र क्षमता वृद्धिको लागि पालिकाले तालिमको आयोजना गरिएको उपाध्यक्ष ठकुरीले बताए । उनले बालविकास केन्द्रमा सेवा सुविधा कम भए पनि सेवारत रहने शिक्षकहरुको प्रशंशा गर्दै अनवरत रुपमा कामले शिक्षा क्षेत्रमा महत्वपूर्ण भूमिका खेलेको बताए ।
कार्यक्रममा शिक्षा शाखा प्रमुख समीर जोशीले बालविकास शिक्षकको वृद्धिविकास र पेशागत विकासका लागि तालिम सञ्चालन गरिएको बताए । चार वर्ष पुग्नुअघि बालबालिकालाई १ वर्ष ज्ञान दिने स्थान नै बालविकास केन्द्र रहेको बताउँदै कक्षा १ पढ्नको लागि आवश्यक ज्ञान दिन मन्टेश्वरी सञ्चालन गरिएको जोशीले बताए । विद्यालयकै आधारशीला बालविकास केन्द्र हो, बालमैत्री र सिकाईमैत्री वातावरणमा बालबालिकालाई अध्यापन गराउनु पर्ने शिक्षकहरुको दायित्व रहेको जोशीले बताए ।
१६ गते सम्म सञ्चालन हुने तालिममा ४० वटा बाल विकास केन्द्रका शिक्षकहरुको सहभागिता रहेको छ । चार दिने तालिमलाई प्रशिक्षकद्धय रजनी श्रेष्ठ र रश्मी श्रेष्ठले सहजीकरण गर्ने छन् । कार्यक्रममा शिक्षा युवा तथा खेलकुद शाखा प्रमुख समीर जोशी, प्रशिक्षकद्धय रजनी श्रेष्ठ र रश्मी श्रेष्ठ, शिक्षक स्रोत व्यक्ति धुव्रराज विष्ठ, प्राविधिक सहायक दीपेन्द्र अधिकारी लगायतको आतिथ्यता रहेको थियो ।
