हेटौँडा / दसौँ राष्ट्रिय हेटौँडा भेट्रान्स कप ८ ए साइड रनिङ शिल्ड फुटबल प्रतियोगिता आगामी फागुन २२ गते देखी आयोजना हुने भएको छ । आइतबार हेटौँडा भेट्रान्स क्लबद्वारा आयोजित पत्रकार सम्मेलनमा दशौँ संस्करणको प्रतियोगिता फागुन २२ गते देखी २६ गते सम्म हेटौडा ४ मा रहेको हुप्राचौर खेलमैदानमा आयोजना हुने क्लबका अध्यक्ष रमेश कुमार उप्रेतीले जानकारी गराउनु भयो ।
स्वास्थ्यका लागी खेलकुद भन्ने नाराका साथे गत वर्ष देखी ४५ वर्ष माथि उमेर समूहमा प्रतियोगिता आयोजना गर्दै आएको र यस वर्ष पनि ४५ वर्ष माथि उमेर समूह बिच देशैभरका १६ वटा भेट्रान्स क्लबहरूको सहभागिता रहने उप्रेतीले बताउनु भयो । स्वास्थ्यका लागी खेलकुद भन्ने नाराका साथ आयोजना हुने भेट्रान्स प्रतियोगिताले पूर्व खेलाडीहरूको सम्बन्ध विस्तार र भाइचाराको सम्बन्ध प्रगाढ बनाउने क्लबका अध्यक्ष उप्रेतीले बताउनुभयो ।
यसले स्वास्थ्य सँगै फुटबल खेलको विकासमा ठुलो योगदान पु¥याउदै आएको छ,खेलाडीहरूको बिचको सुमधुर सम्बन्धलाई प्रगाढ बनाउँदै पुरानो सम्बन्धलाई नवीकरण गर्दै मकवानपुर जिल्लालाई खेल क्षेत्रसँगै पर्यटन क्षेत्रमा पनि थप टेवा पूर्याउन अनि देशैभरका भेट्रान्स खेलाडीहरूमा भाईचार, बन्धुत्वको भावनालाई मूर्तरूप दिनु नै यस प्रतियोगिताको मुख्य उद्देश्य रहेको अध्यक्ष उप्रेतीले बताउनु भयो । प्रतियोगिता सम्पन्न गराउन अनुमानित १२ लाख रुपैयाँ खर्च हुने बताइएको छ ।
प्रतियोगितामा मुख्य सहयोगीका रूपमा हेटौँडा उपमहानगरपालिका रहनेछ भने हेटौडा स्कुल म्यानेजमेन्ट लगायत विभिन्न पालिकाहरू, वडा कार्यालयहरु, संघ संस्था तथा समाजसेवी, फुटबल खेलप्रेमीहरुको साथ सहयोग रहने बताइएको छ । प्रतियोगितामा पहिलो हुने समूहले एक लाख ५० हजार ५ सय ५५ र दोस्रो हुने समूहले ७५ हजार ५ सय ५५ प्राप्त गर्नेछन् । यस्तै विधागत खेलाडीहरू सर्वश्रेष्ठ कोच,उत्कृष्ट फरवार्ड,उत्कृष्ट गोलकिपर,उत्कृष्ट डिफेन्स,उत्कृष्ट मिडफिल्डलाई जनही ५ हजार र म्यान अफ द सिरिज हुने खेलाडीलाई १० हजार पुरस्कार रहेको छ । यस अघिको नवौँ संस्करण बानेश्वर फ्रेण्डसीप भेट्रान्स क्लबले हात पारेको थियो ।
