हेटौँडा \ हेटौँडा औद्योगिक क्षेत्रभित्र उद्योग स्थापना गर्न सम्झौता गरी समयमा उद्योग सञ्चालन नगर्ने तीन वटा उद्योगसँगको सम्झौता रद्द गरिएको छ । ती उद्योगले बनाएका संरचना लिलामीका लागि प्रक्रिया सकेत अगाडि बढाइएको हो ।
हेटौँडा औद्योगिक क्षेत्रमा उद्योग स्थापना गर्न जग्गा भाडामा लिने र लामो समयसम्म उद्योग स्थापना नगरी जग्गा ओगट्ने प्रवृत्ति बढ्दै गएको अवस्थामा औद्योगिक क्षेत्र व्यवस्थापन कार्यालयले लामो समय उद्योग सञ्चालनमा नल्याउने र सम्झौताविपरीत कार्य गर्ने उद्योगहरुसँगको सम्झौता रद्द गरेको हो ।
कार्यालयले औद्योगिक क्षेत्रभित्र जग्गा भाडा सम्झौता गरेका नाथ फुड्स इण्डष्ट्रिज, लक्ष्मी पेन्ट्स र सनराइज कन्टेनर प्रा.लि. सँगको सम्झौता रद्द गरी ती उद्योगले बनाएका भवन÷संरचनाजन्य सम्पत्तिहरुको लिलामी प्रक्रिया अगाडि बढाएको हो । कार्यालयले सम्झौता रद्द गरी ती उद्योगले बनाएका भवन लगायतका संरचनाहरुको लिलामी प्रक्रिया अगाडि बढाएसँगै उक्त जग्गामा नयाँ उद्योग स्थापनाका लागि जग्गा भाडामा दिनका लागि पनि प्रस्ताव आह्वान गरेको छ ।
कार्यालयका सूचना अधिकारी रमेशराज नेपालले २०७२ र २०७३ सालमा उद्योग स्थापना गर्न जग्गा भाडा सम्झौता गरी लामो समयसम्म पनि उद्योग सञ्चालनमा नल्याएर जग्गा आगटेर बसेपछि सम्झौता रद्द गरिएको जानकारी दिनुभयो । उहाँले उद्योग सञ्चालनमा नल्याएपछि उद्योगहरुसँग भएको सम्झौता यसअघि नै रद्द गरिए पनि ती उद्योगहरु अदालत पुगेकाले केही समय लम्बिएको भन्दै अदालतले औद्योगिक क्षेत्रको पक्षमा निर्णय गरेकोले बनेका संरचना लिलामीमा लैजाने र नयाँ उद्योग स्थापनाका लागि प्रक्रिया अगाडि बढाइएको बताउनुभयो ।
ती उद्योगसँगको जग्गा सम्झौता औद्योगिक क्षेत्र व्यवस्थापन लिमिटेड सञ्चालक समितिको गत माघ २७ गते बसेको बैठकले रद्द गर्ने निर्णय गरेको थियो । नाथ फुड्स इण्डष्ट्रिजले ७.७५ रोपनी, लक्ष्मी पेन्ट्सले ६.३४ रोपनी र सनराइज कन्टेनर प्रा.लि.ले १०.०३ रोपनी जग्गा भाडामा लिने गरी सम्झौता गरेका थिए ।
उद्योग सञ्चालन गर्न नाथ फुड्स इण्डष्ट्रिजले नौ लाख ८३ हजार ३३८, लक्ष्मी पेन्ट्सको ३८ लाख २६ हजार ८३२ र सनराइज कन्टेनर प्रा.लि.को २५ लाख २० हजार ९३५ रुपियाँ बराबरको बनाएको संरचना लिलामीका लागि कार्यालयले प्रक्रिया अगाडि बढाएको छ । यी उद्योगहरुले उद्योग सञ्चालन गर्न हेटौँडा कपडा उद्योग र विस्तारित औद्योगिक क्षेत्रको जग्गा भाडाका लागि सम्झौता गरेका थिए ।
उद्योग स्थापना गर्न सम्झौता भएको मितिले छ महिनाभित्रमा निर्माण सुरु गर्नुपर्छ र दुई वर्षभित्रमा संरचना निर्माण गरी उद्योग सञ्चालनमा ल्याइसक्नु पर्छ सूचना अधिकारी नेपालले भन्नुभयो, "उद्योगले तोकिएको समय सीमामा उद्योगका लागि आवश्यक संरचना निर्माण गर्न नसक्नुको औचित्य र कारण खुलाएर आवेदन दिएमा म्याद थप्न सकिन्छ ।" उहाँले जग्गा भाडामा लिने र उद्योग सञ्चालन नगर्ने प्रवृत्ति अन्त्य गर्न कडाइ गरिएको सुनाउनुभयो ।
औद्योगिक क्षेत्रमा हाल उद्योग, कार्यालय, संस्थालगायत गरी १४३ वटा छन् । तीमध्ये १२७ उद्योग रहेकामा हाल ११५ वटा उद्योग मात्र सञ्चालनमा छन् । चालु आवमा लक्की पोली इण्डष्ट्रिजले परीक्षण उत्पादन थालेको छ भने प्रिसियस वेष्ट रिफाइनरीको भौतिक संरचना निर्माणाधीन रहेको कार्यालयले जनाएको छ ।
