हेटौडा / मकवानपुरको भीमफेदी गाउँपालिकामा रैथाने बाली खेती प्रोत्साहनबाट चार सय २४ जना कृषकहरू लाभान्वित भएका छन् । गाउँपालिकाले कोदो र फापरको खेती गर्ने किसानलाई प्रोत्साहनको कार्यक्रम ल्याएपछि किसानहरू थप उत्साहित भएका हुन । गाउँपालिकाको प्रोत्साहन पाउने भएपछि रैथाने बाली कोदो उत्पादनमा वृद्धि समेत भएको छ । किसानको मेहनत र भीम फेदी गाउँपालिकाको सहयोगका कारण यस क्षेत्रमा कोदो उत्पादनमा किसानहरूले जोड दिएका छन् ।
रैथाने बाली खेती प्रोत्साहनबाट भीम फेदी गाउँपालिका वडा नं ४ गुण्डिङ्का कृषक प्रवीण घलानले अधिकतम २७ हजार आठ रुपैयाँ प्रोत्साहन रकम प्राप्त गरेको कृषि शाखा प्रमुख उज्ज्वल राना मगरले बताउनु भयो । यस्तै गाउँपालिकाको प्रकाशित सूचना बमोजिम परेको आवेदन मध्ये २ हजार पाँच सय १० रोपनी जग्गामा ४ सय ५१ जना कृषकले कोदो रोपेको र त्यसबाट २ सय ५५ मेट्रिक टन कोदो उत्पादन हुने अनुमान गरेको प्रमुख राना मगरले बताउनु भयो । सबै कृषकहरूले आवेदन दिनुभएको छैन तर पालिकाभित्रको तथ्याङ्क हेर्ने हो भने चैँ समग्र गाउँपालिका भरी ५ हजार १३ रोपनी क्षेत्रफलमा कोदो खेती हुने गरेको पाइएको छ,यस मध्ये ५ सय ९ मेट्रिक टन सम्म कोदो उत्पादन हुने अनुमान गरिएको राना मगरले बताउनु भयो ।
रैथाने बाली खेती प्रोत्साहनका लागी भनेर पालिकाले कृषकहरूलाई नगद अनुदान दिन थालेपछि कोदो उत्पादनमा किसानको मनोबल बढेको उहाँले बताउनु भयो । पालिकाले कोदो लगाएको क्षेत्रफलको आधारमा नगद अनुदान प्रोत्साहन वितरण गर्ने उद्देश्यले कार्यक्रम ल्याइएको प्रमुख राना मगरले बताउनु भयो । कृषकले २ रोपनी भन्दा बढी कोदो बाली लगाएको क्षेत्रफलको आधारमा पालिकाले नगद अनुदान प्रदान गरेको छ । गाउँपालिकामा आर्थिक वर्ष २०८०÷८१ देखि यो कार्यक्रम सुरु गरे पनि आर्थिक वर्ष २०८१÷८२ बाट कृषि कार्यक्रम सञ्चालन सम्बन्धी निर्देशिका २०८१ बनाएर सञ्चालन गरेको राना मगरले बताउनु भयो । गाउँपालिकाले रैथाने बाली कोदोको न्यूनतम समर्थन मूल्य प्रति केजी ५५ रुपैयाँ र फापरको न्यूनतम समर्थन मूल्य प्रति केजी सय रुपैयाँ तोकिएको छ ।
रैथाने वाली कोदोको वडागत लाभान्वित कृषक सङ्ख्या विवरण अनुसार वडा नम्बर १,२,३ र ४ मा क्रमशः ४२ जना,६४ जना,१०७ जना र ६४ जना कृषकहरू लाभान्वित भएका छन् भने वडा नम्बर ५,६,७ र ८ मा क्रमशः ४० जना,३४ जना १ जना र ७२ जना गरी पालिका भरी ४ सय २४ जना कृषकहरूले लाभान्वित पाएको प्रमुख राना मगरले बताउनु भयो । रैथाने वाली खेती प्रोत्साहनका लागि नगद अनुदान कार्यक्रम अन्तरगत पालिकाले ३५ लाख रकम विनियोजन गरेको छ ।
रैथाने बाली कोदो र फापरको उत्पादनमा वृद्धि गर्दै गाउँपालिका बाट रैथाने बाली निर्यातमा जोड दिने उद्देश्यले यो कार्यक्रम लागु गरिएको गाउँपालिकाका अध्यक्ष हिदम लामाले बताउनु भयो । कोदो उत्पादक किसानको मनोबल बढाउन कोदो बाली लगाएको क्षेत्रफलको आधारमा नगद प्रोत्साहन वितरण गर्ने र कोदो खेती प्रवद्र्धन तथा व्यावसायिक उत्पादनमा व्यवसाय विस्तार गरी भीमफेदी गाउँपालिकालाई खाद्यान्नमा आत्मनिर्भर बनाउने मुख्य उद्देश्य रहेको अध्यक्ष लामाले बताउनु भयो ।
