हेटौडा / बागमती प्रदेशमा आठ सय ९३ वटा घरेलु हिंसा र चार सय ६६ वटा लैङ्गिक हिंसाका घटना भएको छ । चालु आर्थिक वर्ष २०८१÷८२ को फागुन सम्मको तथ्याङ्क हेर्दा प्रदेशभित्र लैङ्गिक र घरेलु हिंसाका घटनाहरू वृद्धि भएको हो । आठ महिनाको अवधिमा जिल्लागत रूपमा लैङ्गिक हिंसाका घटना अन्तरगत चितवनमा ७९,मकवानपुरमा ७७,सिन्धुलीमा ५०,दोलखामा २६,रामेछापमा २१, सिन्धुपाल्चोकमा ५३,काभ्रेमा ५७ वटा,धादिङमा ५७ , रसुवामा ४ वटा र नुवाकोटमा ४२ वटा रहेका छन् । लैङ्गिक हिंसाका घटनाको तथ्याङ्कमा सबैभन्दा बढी चितवन जिल्लामा ७९ वटा र सबै भन्दा कम रसुवामा ४ वटा लैङ्गिक हिंसाका घटना भएको प्रदेश प्रहरी कार्यालय हेटौडाले जनाएको छ ।
यस्तै चालु आर्थिक वर्षमा प्रदेश भित्र घरेलु हिंसाका घटनाहरूको तथ्याङ्क अनुसार चितवनमा ३ सय ३९ वटा, काभ्रे जिल्लामा एक सय १८ वटा, मकवानपुरमा एक सय ७२ वटा, धादिङमा ६२ वटा, सिन्धुलीमा ७३ वटा नुवाकोटमा ६३ वटा, दोलखामा १६ वटा, सिन्धुपाल्चोकमा ४१ वटा, रामेछापमा ९ वटा रहेकाछन भने रसुवामा एउटा पनि घरेलु हिंसाका घटना नभएको बागमती प्रदेश प्रहरी कार्यालय हेटौडाले जनाएको छ । सबैभन्दा बढी चितवनमा र कम रामेछापमा देखिन्छ भने रसुवामा शून्य घटना घटेको तथ्याङ्कले जनाउँदछ । बागमती प्रदेशमा लैङ्गिक तथा घरेलु हिंसाको ग्राफ निरन्तर उकालो लागेको छ । काठमाडौँ उपत्यका बाहेक प्रदेशका १० वटा जिल्लामा विगत वर्षको तथ्याङ्क विश्लेषण गर्दा लैङ्गिक तथा घरेलु हिंसाका घटनाको ग्राफ निरन्तर उकालो लागेको पाइएको हो ।
यो आवमा लैङ्गिक हिंसा अन्तरगत आत्महत्याका घटनामा २ सय ७ वटा उजुरी परेको छ ।
सबैभन्दा बढी मकवानपुरमा ३९ जनाको मुद्दा रहेको छ भने सबै भन्दा कम रसुवामा शून्य रहेको छ । यस्तै जबरजस्ती करणीका घटनामा एक सय ६६ वटा उजुरी परेकोमा सबैभन्दा बढी चितवनमा ३४ वटा मुद्दा परेको छ भने सबैभन्दा कम रसुवा र रामेछापमा तिन तिन वटा मुद्दा परेको छ । जबरजस्ती करणी उद्योग तर्फ प्रदेश भरी ३४ वटा मुद्दा दर्ता भएकोमा सबैभन्दा बढी सिन्धुपाल्चोक र काभ्रेमा ६-६ वटा मुद्दा रहेकाछन भने सबैभन्दा कम रामेछाप र रसुवामा शून्य रहेको छ । यस्तै मानव बेच बिखनको मुद्दातर्फ प्रदेश भरी ६ वटा मुद्दा रहेका छन जसमा चितवन,काभ्रे र नुवाकोटमा दुई दुई वटा मुद्दा रहेका छन भने अन्य जिल्लामा शून्य रहेको छ ।
बहुविवाह तर्फ प्रदेशभर २६ वटा मुद्दा दर्ता भएकोमा सबैभन्दा बढी मकवानपुर र सिन्धुलीमा पाँच पाँच वटा रहेका छन भने दोलखामा शून्य रहेको छ । बालविवाह तर्फ प्रदेशभर सिन्धुलीमा दुई वटा मुद्दा रहेको छ भने अन्य जिल्लामा सुन्य रहेको छ । यस्तै बाल यौन दुराचार मुद्दातर्फ प्रदेशभर २४ वटा घटना दर्ता भएकोमा सबैभन्दा बढी चितवनमा सात वटा रहेको छ भने सिन्धुली,दोलखा र रसुवामा शून्य घटना रहेको छ । अप्राकृतिक मैथुन मुद्दा अन्तरगत काभ्रेमा एउटा मात्र घटना भएको देखिन्छ । यो आर्थीक बर्ष २०८१\८२ मा बोक्सीको आरोपका घटनाका कुनै पनि जिल्लामा मुद्दा दर्ता नभएको तथ्याङ्कले देखाएको छ ।
