हेटौडा / स्वतन्त्र विद्यार्थी युनियन (स्ववियु) निर्वाचन अन्तर्गत मकवानपुरको हेटौडा क्याम्पस, मकवानपुर बहुमुखी क्याम्पस,बशंगोपाल बहुमुखी क्याम्पस र निर्मल बहुमुखी क्याम्पस गरी चार क्याम्पसहरूमा अनेरास्ववियुले जित हासिल गरेको छ । यो सँगै वन विज्ञान क्याम्पसमा नेविसंघले जित हासिल गरेको छ भने मनहरी बहुमुखी क्याम्पसमा नेकपा एकीकृत समाजवादी निकट अनेरास्ववियू सर्वसम्मत चयन भएका छन् । जिल्लामा अखिल नेविसंघ गठबन्धन अन्तर्गतका संयुक्त प्यानलले जित हासिल गर्न सफल भएको देखिन्छ । मकवानपुरमा जिल्लाका ७ क्याम्पसहरूमध्ये चार क्यम्पसहरुमा स्वतन्त्र विद्यार्थी युनियन (स्ववियु) निर्वाचन सम्पन्न भएका हुन भने दुई क्याम्पसमा सर्वसम्मत र थाहा नगरपालिकास्थित पालुङ बहुमुखी क्याम्पसमा निर्वाचन रोकिएको छ ।
स्ववियु निर्वाचन अन्र्तगत मकवानपुर बहुमुखी क्याम्पसमा अखिलनेविसंघ गठबन्धनबाट अनेरास्ववियुका प्रसिद्ध रेग्मी निर्वाचित हुनुभएको छ । बुधवार बिहान सम्पन्न मतगणना अनुसार ७ सय ६ मतसहित रेग्मी अध्यक्षमा निर्वाचित हुनुभएको हो । उहाँका निकटतम प्रतिद्वन्द्वी अखिल क्रान्तिकारीका छोइसाङ लामाले ५ सय ७ मत प्राप्त गर्नुभयो । सदस्यहरूमा पनि रेग्मी प्यानलकै विजयी भएका छन् । सचिवमा रेग्मी प्यानलकै नेविसंघका उत्सव ढुङ्गाना, कोषाध्यक्षमा अनेरास्ववियुका निर्दोष लुइँटेल,सदस्यहरूमा अनेरास्ववियुका मनोज घलान,दिवस चौलागाई,उमेश चौधरी,साजिर अन्सारी र नेविसंघका कृषन थिङ,मन्दिप थापा,अतीत अधिकारी र विवश अर्याल निर्वाचित हुनुभएको छ । मकवानपुर बहुमुखी क्याम्पसमा दुई हजार छ सय ९८ मतदातामध्ये एक हजार दुई सय ८१ मत खसेको प्रमुख निर्वाचन अधिकृत सन्देश विडारीले जानकारी दिनुभयो ।
यस्तै हेटौँडा–१० स्थित वन विज्ञान क्याम्पसको स्ववियु अध्यक्षमा श्यामराज भट्ट निर्वाचित हुनुभएको छ । मतगणना अनुसार नेविसंघका भट्ट २ सय ४६ मतसहित अध्यक्ष निर्वाचित हुनुभएको हो । वन विज्ञान क्याम्पसमा नेविसंघले लगातार तेस्रो पटक अध्यक्ष जितेको हो । वन विज्ञान क्याम्पसमा पनि नेविसंघ र अनेरास्ववियुबीच सहकार्य भएको हो । अध्यक्षका अर्का आकाङ्क्षी अनेरास्ववियु (क्रान्तिकारी) का छत्र शाहीले एक सय १८ मत प्राप्त गरी पराजित हुनुभयो । सचिवमा अनेरास्ववियुका सुगम भुसाल क्षेत्री, कोषाध्यक्षमा नेविसंघकी पूर्णिमा पन्त र सदस्यहरूमा युनिशा धामी, रोहन केसी, विनय तिम्सिना, किरणकुमार रावल र जष्टिना श्रेष्ठ विजयी हुनुभएको छ ।
यस्तै हेटौँडा क्याम्पसको अध्यक्षमा पनि अखिल नेविसंघ गठबन्धन अनेरास्ववियुका अभि मैनाली निर्वाचित हुनुभएको छ । मतगणना अनुसार २ सय ५१ मतसहित मैनाली विजयी हुनुभएको हो । अध्यक्ष पदका अर्का आकाङ्क्षी अखिल क्रान्तिकारीका दीपक वाइबा एक सय १९ मत सहित पराजित हुनुभयो । सचिवमा मैनालीकै प्यानलबाट अनेरास्ववियुका गणेश तिम्सिना विजयी हुनुभएको छ भने कोषाध्यक्षमा मैनाली प्यानलबाट नेविसंघका सुरज बोलखे निर्वाचित हुनुभएको छ । सदस्यहरूमा अखिल नेविसंघ गठबन्धनबाट शिशिर ढकाल,नितेश भण्डारी,नितिश कुमार यादव, मुना सिकारी,अखिलेश कुमार यादव निर्वाचित हुनुभएको छ । हेटौँडा क्याम्पसमा कुल छ सय ८५ जना मतदातामध्ये ३ सय ७४ जनाले मतदान गरेको सहायक क्याम्पस प्रमुख मनोज पोखरेलले जानकारी दिनुभयो ।
उता हेटौँडा–१९, बस्तीपुरस्थित निर्मल बहुमुखी क्याम्पसमा पनि अखिल नेविसंघ गठबन्धन बाट अनेरास्ववियुका प्रशान्त भण्डारीको प्यानल नै विजयी हुनु भएको छ । निर्वाचनमा ५३ मतसहित भण्डारी अध्यक्ष पदमा निर्वाचित हुनुभएको हो । अध्यक्षका आकाङ्क्षी विप्लव निकट अखिल (समाजवादी) की नबिना घलानले ३१ मत प्राप्त गर्नुभयो । निर्मल बहुमुखी क्याम्पसमा ८७ जना मतदाता मध्ये ८४ मत खसेको प्रमुख निर्वाचन अधिकृत गोपी रमण प्याकुरेलले जानकारी दिनुभएको छ । भण्डारीको प्यानलबाट सचिवमा मुना भण्डारी, कोषाध्यक्षमा सविन अर्याल, सदस्यमा अम्बिका अर्याल, आयुषा ढकाल, सुजन तामाङ र दुर्गाकुमारी पण्डित निर्वाचित हुनुभएको छ ।
यसै गरी हेटौँडा–६, चौघडास्थित वंश गोपाल बहुमुखी क्याम्पसमा सर्वसम्मत नयाँ समिति चयन भएको थियो । सङ्गठनबिचको आपसी छलफलपछि अध्यक्षमा सर्वसम्मत रूपमा अनेरास्वबियुका दिवस सिलवाल चयन हुनुभएको छ । उपाध्यक्षमा राष्ट्रिय प्रजातान्त्रिक विद्यार्थी सङ्घटनका सजना घिमिरे, सचिवमा अनेरास्वबियुका सुवास राई, कोषाध्यक्ष क्रान्तिकारीका आशाराम गोले, सहसचिवमा नेबिसंघका आशिष् भोलन निर्वाचित हुनुभएको छ । यस्तै सदस्यमा क्रान्तिकारीका आयुषा बुढाथोकी र अनेरास्वबियुबाट निश्चल गजुरेल, सन्तोष पुडासैनी, पूजा लम्साल, सुषमा गौतम, सुशील तिम्सिना चयन हुनुभएको क्याम्पस प्रमुख लक्ष्मण कँडेलले बताउनु भयो ।
मकवानपुरको थाहा नगरपालिकास्थित पालुङ बहुमुखी क्याम्पसमा स्वतन्त्र विद्यार्थी युनियन (स्ववियु) को निर्वाचन हुन सकेन । ७२ जना मतदाता रहेको क्याम्पसमा तालाबन्दीसँगै निर्वाचन अनिश्चित बनेको छ । अनेरास्ववियुबाट रोशनी गोपाली र अखिल क्रान्तिकारीबाट रुमिना खत्री अध्यक्ष पदका उम्मेदवार थिए ।
यो सँगै मकवानपुरको मनहरी गाउँपालिकास्थित मनहरी बहुमुखी क्याम्पसमा पनि स्ववियुको नयाँ समिति सर्वसम्मत चयन भएको थियो । निर्वाचन समिति संयोजक जयराम अर्यालले नेकपा एकीकृत समाजवादी निकट अनेरास्ववियूका कुमार घिसिङको नेतृत्वमा स्ववियु समिति सर्वसम्मत गठन भएको जानकारी दिनुभयो । घिसिङ दोस्रो पटकका लागि स्ववियु सभापति बन्नुभएको हो । समिति सचिवमा नेविसंघका अविक दाहाल, कोषाध्यक्षमा क्रान्तिकारीका पासाङ मुक्तान, सदस्यहरूमा नेविसंघका विष्णु कामी, क्रान्तिकारीका गुणराज स्याङ्बो र अनेरास्ववियुका शितल लामा चयन भएको निर्वाचन समिति संयोजक अर्यालले बताउनुभयो ।
