हेटौँडा \ नेपाल प्रेस युनियनको नवौं महाधिवेशन अन्तर्गत नयाँ नेतृत्वका लागि आज निर्वाचन हुँदैछ । शुक्रबार हेटौँडामा सुरु भएको महाधिवेशनमा उद्घाटन र बन्दसत्रका सबै कार्यक्रम सकिएसँगै आज नेतृत्वका लागि प्रतिस्पर्धा हुन लागेको हो । यसका लागि उम्मेदवारी दर्ता र उम्मेदवारहरूको अन्तिम नामावली प्रकाशनको काम समेत शुक्रबार नै सकिएको छ ।
प्रेस युनियन केन्द्रमा पदाधिकारी, केन्द्रीय सदस्य र केन्द्रीय लेखा समिति समेत गरी १२० जनाको प्रतिनिधित्व रहनेगरी विधानमा व्यवस्था गरेको छ । जसमध्ये अध्यक्ष १, वरिष्ठ उपाध्यक्ष १, उपाध्यक्ष १२, महासचिव १, उपमहासचिव ६, सचिव १७, कोषाध्यक्ष १ र केन्द्रीय सदस्य ७६ जना समेत गरी कुल ११५ जना रहने व्यवस्था छ ।
निर्विरोध निर्वाचित
नेपाल प्रेस युनियनको नवौं महाधिवेशनमा समावेशी उपाध्यक्षमा निर्वाचित दिपेन्द्र वान्तवा, सचिवमा निर्वाचित सहदेव चौधरी,अशोक तिवारी, छायाचन्द्र भण्डारी, केन्द्रीय सदस्यमा निर्विरोध निर्वाचित फुलमाया सुनार (फुलु), सुशीला रेग्मी, निमा वाङगेल लामा, अन्जना चौधरी, लक्ष्मीमान चाैधरी, कमला कुमारी चाैधरी, जेविका कार्की, तेजना पण्डित, बालिका शिवाकोटी, रमा लुइटेल, शुसिला संग्रौला, माया अधिकारी, छविलाल कुमाल, सुवास कुमार सुनुवार, रीता कुमारी मगर, कौरव खत्री,अप्सरा पुडासैनी, नीलिमा पौडेल, आत्मा गुरागाई, कृष्ण कुमारी ढकाल, पूजा शर्मा, सृजना कुमारी गौतम, जमुना न्यूरे, निर्मला भट्ट, नारद कोहार निर्विरोध चयन भैसकेका छन् ।
त्यस्तै, केन्द्रीय लेखा समितिमा संयोजक १ र सदस्य ४ जना समेत गरी ५ सदस्य रहने व्यवस्था छ । यस्तै कुल १२० वटा पदमध्ये ११८ पदका लागि उम्मेदवारी परेको छ । दुई पदका लागि कुनै पनि मनोनयन दर्ता भएको छैन भने उम्मेदवारी परेका ३१ पदमा निर्विरोध निर्वाचित भएको घोषणा भइसकेको छ ।
मनोनयन दर्ता नभएको पदमा अल्पसंख्यक महिला कोटाको केन्द्रीय सदस्य र उपत्यका महिला कोटाको केन्द्रीय सदस्य पद रहेको छन् । अल्पसंख्यक महिला केन्द्रीय सदस्यतर्फ १ जनाको कोटामा कुनै पनि मनोनयन दर्ता भएन । उपत्यका प्रदेशको महिला केन्द्रीय सदस्यमा २ जनाको कोटामा १ जनाको मात्रै मनोनयन दर्ता भयो । बाँकी ८७ पदका लागि भने आज निर्वाचन हुँदैछ । यसका लागि १७३ जना उम्मेदवार चुनावी मैदानमा छन् ।
